喺五、六年前，當 DC 推出市場無幾耐，
多咗人將自己影嘅相放上網；
嗰時，我喺見到一輯旅行相，
呢個地方色彩奪目，未被污染，
有大大小小綿綿嘅瀑布，
又有清徹見底，碧藍色嘅湖水，
加埋滿山樹木又紅又黃，
靚到不得了。
睇完呢輯相，我就已經立下決心，
一定要去一次嗰度旅行，
嗰度就係───九寨溝。

雖然當年咁想去九寨溝，
但係一同阿媽講，
佢就話去九寨溝搭車要搭成十幾個鐘頭， 行嘅山路又危險，
睇新聞成日都聽到有車禍事故，
所以一直以來佢都反對我去...
又話遲 D 會有飛機開通，
叫我等個機場起好先去啦...

如是者，幾年以來，
每次見到九寨溝嘅相，
睇到九寨溝嘅電視特輯，
都依然記得自己去九寨溝嘅心願仲未成...

前幾年，九黃機場終於都起好咗，
當時都幾開心，因為覺得自己同九寨溝嘅距離近咗好多，
不過，當時又搵唔到 partner 一齊去，
因為去九寨溝其實都唔平，
以相同嘅價錢，唔少人都寧願去日本玩返轉...

上年年中嘅時候，
喺 Yvonne 屋企個 club house 度打緊羽毛球，
坐喺場邊睇緊報紙嘅時候，見到一 D 九寨溝嘅廣告，
大家傾傾吓先發覺原來佢都有興趣去九寨溝。
當時我哋半吹水咁話 10月一齊去，
唔記得咗咩原因，最後都係去唔成...

到咗今年6月左右，
我哋又再提返起去九寨溝呢件事，
Yvonne 叫我整個 draft plan 先，
睇睇個日曆，原來 10月中，
只要請4日假，就可以去9日旅行，
而且呢段時期，正正就係九寨溝嘅秋天，
色彩最靚嘅季節。
一直以來都我都咁想去九寨溝，又難得有人肯一齊自遊行，
所以我好快就起咗個 draft 行程。
路線、日期都定好咗，
咁就要再問吓有邊個有興趣一齊去啦，
咁"Q"阿助近期都投入咗影相嘅行列，
問咗佢，佢都話有興趣去喎~
咁樣我哋一行四人：我、阿助、Yvonne、Daniel (Yvonne 老公)，
人數就 fit 晒 lak！！！
不過嗰時我都仲驚阿助唔可以同我同一齊請假，
去唔成，點知又請到喎~
我渴望已久嘅九寨溝團終於成咗團啦！！！

成咗團，又要講吓買機票，
去九寨溝，首先要飛去成都或者重慶， 然後再轉內陸機，
我哋曾考慮過由香港，或者深圳機場出發，
後來決定去深圳飛，
一來平少少，二來航班多好多，
可以揀早機去，晚機返...

決定咗經深圳出發之後，就真係要落手買機票，
我哋嘅路線係：深圳－成都－九寨溝－重慶－深圳。
不得不讚，而家用國內航空公司 website 買機票真係異常方便，
可以即時報價、即時出票、仲收 VISA 添。
由於時間充足，我哋都唔急於立即買飛，
希望可以見到特價先至買。

8月尾，我哋首先見到南方航空有一張4折(￥520)由深圳飛成都嘅機票，
於是即刻落 order。
9月中，更加買到一張國航嘅超值機票，25折(￥320)，
由重慶飛深圳，真係勁抵！！
不過由 8月至10月不段留意咗成 2個月，
來往九黃機場嘅內陸機票就始終無特價，
所以到最後，我哋要買正價飛(￥980 & ￥880)。

至於酒店方面，大部份都喺網上面訂好咗，
除咗第7晚，希望可以彈性少少，
諗住去到先 walk-in。
萬事俱備，終於可以出發，
去呢個人間仙境───九寨溝啦！！！